मिठी नदी लगतची २७० पेक्षा अधिक बांधकामे तोडली

नदीची संरक्षक भिंत बांधण्यासह पालिकेच्या प्रकल्पांना मिळणार गती

के पूर्व विभागाच्या कारवाईमुळे पाण्याचा जलद निचरा होण्यास मदत

मुंबई ( २ डिसेंबर ) : मिठी नदी पात्राजवळील २७० पेक्षा अधिक बांधकामे महापालिकेच्या 'के पूर्व' विभागाद्वारे करण्यात आलेल्या धडक कारवाई दरम्यान तोडण्यात आली आहेत. 'परिमंडळ ३' चे उपायुक्त आनंद वागराळकर यांच्या मार्गदर्शनाखाली करण्यात आलेल्या या धडक कारवाईमुळे सदर परिसरात मिठी नदीची संरक्षक भिंत बांधण्यास मदत होणार आहे. तसेच या कारवाईमुळे मोकळ्या झालेल्या भागात सेवा मार्गिका (Service Road) बांधणे शक्य होणार असून ज्यामुळे भविष्यात मिठी नदीतील गाळ साफ करण्याच्या दृष्टीने आवश्यक ती यंत्रसामुग्री नदीपात्रात उतरविणे सुलभ होणार आहे. परिणामी पावसाळ्याच्या काळात नदीतील पाण्याचा निचरा अधिक जलद होण्यासही मदत होणार आहे. तसेच या परिसरात जागा उपलब्ध झाल्याने 'मलजल प्रक्रिया केंद्र' उभारणे, परिसराचे सौंदर्यीकरण करण्यासह नागरी सेवा सुविधा देण्याच्या दृष्टीने कार्यवाही करणे सुलभ होणार आहे, अशी माहिती 'के पूर्व' विभागाचे सहाय्यक आयुक्त देवेंद्रकुमार जैन यांनी दिली आहे.

मिठी नदीच्या पात्राजवळ उद्भवलेली २७० बांधकामे / अतिक्रमणे ही हटविण्यासाठी मुंबई पोलीस दलाचे विशेष सहकार्य महापालिकेला लाभले. साधारणपणे ५५ पोलीस कर्मचा-यांचा ताफा या कारवाई दरम्यान घटनास्थळी उपस्थित होता. तर महापालिकेचे सुमारे ६२ कामगार – कर्मचारी - अधिकारी या कारवाईत सहभागी झाले होते. या कारवाईसाठी ३ जेसीबी, २ पोकलेन यासह इतर आवश्यक साधनसामुग्री वापरण्यात आली. या ठिकाणच्या पात्र धारकांना प्रकल्प बाधीतांसाठीच्या (PAP) निवास व्यवस्थेच्या वाटपाबाबत कार्यवाही देखील सुरु करण्यात आली आहे. या कारवाईमुळे 'के पूर्व' विभाग क्षेत्रातील मिठी नदी पात्राजवळील बांधकामे / अतिक्रमणे हटविण्याचे काम आता पूर्ण झाले आहे, अशीही माहिती सहाय्यक आयुक्त जैन यांनी दिली आहे.
Ετικέτες

टिप्पणी पोस्ट करा

[facebook][blogger]

संपर्क फॉर्म

नाव

ईमेल *

मेसेज *

Blogger द्वारा समर्थित.
Javascript DisablePlease Enable Javascript To See All Widget